(وحيد الجزيره) في عيون محبيه

السلام عليكم ورحمة الله وبركاته

صباح الخير ./. مساء الخير أعضاء المنتدى وزواره الكرام أرجو أن تكونوا جميعـاً بأتم الصحه والعافيه

لا أجيد فن المقدمات فقد تقزمت الكلمات وتاورت الحروف خجلا ً أمام عظمة من أريد الكتابه عنه..

(محمد مبارك الضرير)

شاعر لم يبحث عن الإعلام أعطى للشعر حقه فرد له الشعر حقه قصائده حفظت في القلوب قبل أن تحفظها أوراق الصحف ودبلجة الفضائيات يزرع القصيده كـ زراعة الورود ويترك لمتذوقي الشعر الإستمتاع بإستنشاق الشذى يرسم القصيده كـ لوحة فنان يبروزها بالجزاله ويصورها بالروعه لا يملك خلالها المتمعن سوى الدهشه هنا سنقوم بل سنتشرف بحفظ قصائد شاعرنا ليسمتع بها كل متذوقي الشعر ويتعلم منها كل محب للشعر

أرجوا من الإخوه والأخوات أعضاء منتدى محافظة وادي الدواسر عند نقل القصائد مراعاة الآتي: 1/نقل قصيده أو قصيدتين لا أكثر حتى يتسنى للجميع المشاركه. 2/نقل القصائد بشكل صحيح. 3/يجب مراعاة أن القصيده التي سينقلها العضو لم ينقلها عضو سابق. 4/عدم التعليق على القصائد ليظهر الديوان بشكل أجمل.

لكم مني أطيب وأرق التحايا ودمتم جميعا بخـير

أنا بوسط النـار وانـتِ توشوفيـن=العاشـق الولهـان مـا تنقذينـه ؟
أنا سهير العيـن وانـتِ تناميـن=ما ترحمين اللي جفا النوم عينـه ؟
أنا جريـح وعنـدك ادواي تكفيـن=داوي صوابـي والجـروح الدفينـه
كانك تحبّينـي مثـل مـا تقوليـن=فالقول يبغـي فعـل وانـتِ فطينـه
جودي علي بالوصل ياقـرّة العيـن=ان كان مـن يبغـي هواكـم تبينـه
طال الطويل وكمّـل الحـال يازيـن=صبري قضى والقلـب بيّـح كنينـه
كلّش طراته لا تسهّل مـن الحيـن=ولا خير في شي(ن) يجي عقب حينه
لا واهني اللي مـن الحـب ساليـن=واللي بلـي فـي حبّـك الله يعينـه

(إضفر بذات الدين تربت يداك)

بعض البني لو شــفتهن أزين الغيـــد=تـــــرى بعضهن لابخصتــــه عـــلايـل
مثل المعـــادن فيهــن أصلـــي وتقليد=ولاّ الــذهب مافيـــه عــدل(ن) ومــايل
انشــد عن اصل البنت هي من صناديد=ولاّ تجنّبهـــــــا وتلقــى البـــــــــدايـــل
لا تنخــدع في زينهــا ما بهــافيـــــــد=الــزين فيهـــا اليــــوم والصبح زايــل
بنت الــردّي لــو انها أزين من الصيد=ماهيب ماخوذ(ن) لــــذرب الفعــــــايــل
لاجا ولـــدها يبلشــــــك بالمناقيــــــد=مــن عرق خالــه يوجعـــك بالملايـــــل
وفجوجهــا للغانـم أوسـع من البيــد=دوّر وتلقــى من بنــــــــات الحمــــايـــل
أظفــر بذات الــدين بنت الاجاويــــد=لاحـد(ن) ذكــرهم قيـل نعــــم العوايــــل
متمســكين بدينهــم و التقــــــــاليد=بالســتر والحشــمة وكسب الفضايـــــل
تعيش معهـــا دالــه البــــال وســعيد=مع مهـرة(ن) معسوفة(ن) من الاصـايل
تخــاف ربّي فيك ماتعـــرف الكيـــد=متربيــه ذربــه هنـــوف(ن) تمـــــــــايـل

آه يامن تمركـز حبّهـا فـي خفوقـي=ليه ترضين تعذيبـي بليّـا سبايـب ؟
ليه عني تغيّبتي وانـا لـك شفوقـي ؟=القطيعة تـرا ماهيـب سلـم الحبايـب
ما هقيتك تعمّد يا اريش العين عوقـي=ولا هقيت الغلا يمحاه حكـي القرايـب
عقب ماسار حبّك مع دمي في عروقـي=تقطع الوصل ! ما تخشى من الله عقايب
قلبي اللي تولّع فيـك منـك امحروقـي=عندك ادواه من غيره فلا هوب طايـب
والله اني على شوفتك نفسـي تتوقـي=من فراقك دموعي فوق خـدّي سكايـب
لا تذكّـرت ماضـي حبنـا زاد شوقـي=يوم ليل الهوى نقضيـه دلّ وعجايـب
يوم ترخص لي الغالي وتعرف حقوقـي=يشهد الليل ونجوم السمـاء والهبايـب

أنا مشتكيك إلاّ على اللـي بلانـي فيـك=عسى ينتصف لي منك واحتال نسيانـك
بجاهد هوى قلبي وانـا خابـره يغليـك=يحـنّـك ولا ودّه بهـمّـك وحرمـانـك
بغصبه على العليـاء يجنّبـك ويخلّيـك=حشا مقبل الهانة بعـد شفـت نكرانـك
أنا ما جفيتك لين شفت الغلـط كاسيـك=تخون الغـلا واللـي وفالـك ولا خانـك
عقب ما بخصتك مستحيل اقبلك وابغيـك=وكيف اقبلك وانت اللي اعلنت هجرانك ؟
لك الله مرخص عزّة النفس لجل ارضيك=نجوم السماء اقرب لك ولو متّ من شانك
شعورك بحبي لك وزينك علـي مطغيـك=تماديـت فـي غيّـك وزلّيـت بلسانـك
تجاوزت حـدّك وانهـدم حبنـا بيديـك=وذي غلطتك ما دام طاوعـت شيطانـك
خلاص انتهينا لا تجيني ولا أبي آجيـك=ولا همّني حبّـك ولا احتـاج لاحسانـك

أحبّـــــك يـــــوم انــــــا قلبي دليـــلي
000000000 وهمّـــي من فراقـــــك هـــدّ حيـــــلي
على اللـــــه اشــتكي همّــي وهمّــك
000000000 عسـى اللــه يجمــع الشمل وتجيــلي
يطول الليـــل من فرقــــاك واســــهر
000000000 مع الهاجــوس ودمــوعي تســـــيلي
أهوجس فيـــك واكتب بك قصـــــايد
000000000 عســاي أرتــاح لو شــي(ن) قليـــلي
أداعب طيفــــك الغالي واضمّــــــــه
00000000 0 واحضنـه والتـــوي به طول ليــــلي
أشـــوفك واســمعك واشــمّ ريحـك
000000000 وكنـّك جــــالس(ن) معي تحكــي لـي
يلازمنــي خيــالك طــــول وقتـــــي
000000000 عشــــانك عـــايش(ن) فيني نزيلـــي
ســـكنت الــروح والهبت المشــاعر
000000.000 بحســــنك والوفــــــا مالك مثيـــــلي
معــــك حسّـــــيت بالحب الحقيــقي
000000000 أبيـــك ولا تبـــي غيـــــري بــديلــــي
ومهمـــا قلت انــا ماوفيك حقــــك
000000000 نظيــف العــرض والمعـــدن أصـــيلي
ألا يــاويل ويلي مــن فراقــــــــك
000000000 عســــاي افــداك ياضــافي الجــديلــي
عســــى يــومي قبــل يومك حبيبي
000000.000 فــدا ضحكتـــك والخصــر النحـــــيلي
عسى اللـه يحرســك من كل حاسد
000000000 ويجمـــع شـــملنا واشــفي غليــــــلي
فمــــان اللــه وحفظـــه ياغنـــــاتي
000000000 عســـــاك بخيـــر وبعمـر(ن) طويلــي

قلبي معك لو شفت جسمي مع الناس
،،،،،،،،،،،، ما غــاب طيفك عن خيالي دقيقــــه
ودّعتك اللي ما خلق مثلك أجناس
،،،،،،،،،،،،،، حيل الله أقوى لو دموعي غريقـه
والله ما ارخصتك ولا طعت بلاّس
،،،،،،،،،،، بس النصيب يصيب هذي الحقيقـــــه
أظلم سماي وحال من دونك الياس
،،،،،،،،،،،،، وتحشرجت عبرات صدري بضيقه
همّي عقب فرقاك ماهوب ينقاس
،،،،،،،،،،،، وجروح قلبي ياطبيبه غميقــــــــــه
أجلس بوسط الناس واسرح بهوجاس
،،،،،،،،،،، لافي يدي حيلــة ولالي طريقــــــــــه
حبك بوسط القلب مبني على ساس
،،،،،،،،،،، عنك العزى يا روح روحي ماطيقــه

تجمّعت..حـب(ن) وفـرقـا ولـوعـات=وايـام ســود(ن) كلّبـوهـا زهــادي
جارالزمـن وهمـوم قلـبـي ثقـيـلات=لاحــظ يخدمـنـي ولا الصبـر فـادي
مـرارة الواقـع وهـاجـوس مـافـات=زادت جـروحـي الاوّلــه بالـجـدادي
أونّ وابـكـي واسهراللـيـل مـابــات=واصبحـت فـي وادي وروحـي بـوادي
أم العـيـون السـاحـرات الوسيـعـات=ومجـدّل(ن) اشقـر علـيـه الـسـوادي
وعرض(ن) نظيف(ن) مع ثمان(ن)رهيفات=مخلـص لهـا حبّـي وصــادق ودادي
مـن بـدّ خلـق الله هـي ادواي بالـذات=لاشفتهـا يطـيـب جــرح الـفـوادي
أرتـاح معهـا فـي نعـيـم ومـسـرّات=هي مـن جميـع النـاس غايـة مـرادي

الرجال اشكال والـوان والطيّـب قليـل = والعلـوم الطيّبـة مـا بـكـلّ ايدلّـهـا
بعضهم حتى مع اقرب قريبٍ لـه بخيـل = وبعضهم لاجات نفعته جـت فـي حلّهـا
عقّب اللي يقدر الطيـب ويـدوّر بديـل = يمتثل للـي تبيـه المـدام ارضـاً لّهـا
مايشاورغيرها في المقام وفـي الرحيـل = ياخـذ التوجيـه منهـا ويتبـع ظلّـهـا
كم صبي(ن) تنخدع فيه ما يشفي غليـل = لابخصته خوّتـه غصـب عنـك اتملّهـا
في المجالس له سواليف ولسان(ن) طويل = يحسـب ان المرجلـة سالفـة ويهلّهـا
المراجـل ماتجـي بالسوالـف والعويـل = وما بكل(ن) لابغى المرجلة كفو(ن) لّهـا
من بغى الطالات يصبر على الحمل الثقيل = يرتكـي لحمـول الايـام ليـن يشلّـهـا
عزتي للقرم لاصار مـا عنـده حصيـل = ويتستّر فـي رجـا الله عسـاه يحلّهـا
يحترق في صمت يمشي مع العالم عليـل = لو ضحك به علّه مـا حـدٍ يفطـن لّهـا
والله ان اموت ما اجنّب العلـم الجميـل = يا عذولي خـل عنـك النصايـح خلّهـا
كان تحسبني هبيل(ن) فسجّلنـي هبيـل = ماازين هبال(ن) يـروم المراجـل كلّهـا

امسي بهمي واصبح الصبح في زود ودموع عيني يا الغضـي يذرفنّـي والحال مني غاديٍ(ن) كنّـه العـود سلبت عقلي ياهـوي البـال منّـي اسهر طوال الليل والعالـم ارقـود واعيش في ذكرى ليال(ن) مضنّـي أذكر زمان(ن) فات يا جعله يعـود يومك تجينـي تبعـد الهـم عنّـي بيني وبينك ياهوي بالـي عهـود ماهو بحق(ن) تخلف اليـوم ظنّـي لا خفت من ربك ولا خفت منقـود عقب الغلا واللي مضـى تمتحنّـي جازيت من يغليك يا زين بصـدود واصبحت حتى شوفتي لـك تمنّـي ترى الجفا يازين مافيه لـك فـود ارحم حزين(ن) دمعته مـا تونّـي